हैजा सङ्क्रमण बढेपछि वीरगञ्जका विद्यालय बन्द

वीरगञ्ज महानगरपालिकाले बढ्दो हैजाको सङ्क्रमणलाई मध्यनजर गर्दै दुई दिनका लागि महानगरपालिकाअन्तर्गतका सम्पूर्ण विद्यालय बन्द गर्ने निर्णय गरेको छ ।

शैक्षिक प्रशासन महाशाखाले सूचना जारी गर्दै भदौ ८ र ९ गते (आइतबार र सोमबार) दुई दिनका लागि महानगरपालिका अन्तर्गतका सम्पूर्ण सामुदायिक तथा संस्थागत विद्यालयको पठनपाठन स्थगित गर्ने निर्णय गरेको हो ।

सूचनामा हैजा सङ्क्रमणबाट बच्न विभिन्न स्वास्थ्य सावधानी अपनाउन पनि आग्रह गरिएको छ ।

नागरिकहरूलाई पानी उमालेर मात्र पिउन, शौचालय प्रयोगपछि साबुन पानीले हात धुन, सरसफाइका नियम पालना गर्न, काँचो सागसब्जी तातोपानीले पखालेर मात्र खान र सङ्क्रमणबाट जोगिन आवश्यक उपाय अवलम्बन गर्न अनुरोध गरिएको छ ।

महानगरपालिकाले सम्बन्धित सबैमा सूचना कार्यान्वयन गर्न र स्वास्थ्य सुरक्षाप्रति सचेत रहन अपिल गरेको छ । शुक्रवारदेखि वीरगञ्जका विभिन्न वडाहरूमा हैजा सङ्क्रमण पुष्टि भएको छ ।

जोखिम बढ्दै गएपछि सङ्क्रमण फैलिन दिनबाट रोक महानगरले विद्यालय बन्द गर्ने निर्णय गरेको बुझिएको छ ।