छात्रामाथि दुर्व्यवहार आराेपमा विद्यालय ताेडफाेड

सिरहाको गोलबजार–८, चोहर्वास्थित जनता नमूना माविका शिक्षकले छात्रालाई दुर्व्यवहार गरेको भन्दै अभिभावकले विद्यालयमा तोडफोड गरेका छन् ।

श्रेष्ठ थरका शिक्षकले १३ वर्षीया र ८ वर्षीया छात्रालाई दुर्व्यवहार गरेको भनी छात्राकी आमाले विद्यालयमा उजुरी गरे पनि सुनुवाइ नभएकाे आराेपसहित अभिभावक र युवा तोडफोडमा उत्रिएका हुन् । 

शिक्षकलाई पक्राउ गरी कानूनी दायरामा ल्याउन र प्रधानाध्यापकलाई बर्खास्त गर्न अभिभावकले माग गरेका छन् ।विद्यालयमा बाक्लो संख्यामा प्रहरी परिचालन गरिएको छ ।

छोरी विद्यालय जान डराएपछि साेधपुछ गर्दा कुरा खुलेको पीडितकी आमाले बताउनुभएकाे छ । उहाँका अनुसार शिक्षकले कक्षामै संवेदनशील अंग छुने गरेको छाेरीहरुले बताएका छन् । 

आफूले गत शुक्रबारै विद्यालयमा उजुरी गरे पनि प्रधानाध्यापकबाट ढाकछोप गर्न खोजिएको छात्राकी आमाकाे आरोप छ ।

तोडफोड र नाराबाजीपछि गोलबजार प्रहरीले साेमबार शिक्षकलाई नियन्त्रणमा लिएको छ । इन्स्पेक्टर गोविन्दप्रसाद साहले घटनाबारे अनुसन्धान गरिरहेको बताउनुभएकाे छ ।