वन डढेलो नियन्त्रणसम्बन्धी सचेतना कार्यक्रम

गुल्मीमा वन डढेलो नियन्त्रण सचेतना सप्ताहव्यापी कार्यक्रम सुरु भएको छ ।

डिभिजन वन कार्यालय गुल्मीले वन डढेलो नियन्त्रण गर्न सुरु गरेको सप्ताह कार्यक्रमको रेसुंगा नगरपालिकाका नगरप्रमुख खिलध्वज पन्थीले शुभारम्भ गर्नुभयाे । उहाँले जिल्लाका अधिकांश वन डढेलो उच्च जोखिममा रहेकाले प्रत्येक वडा टोलका नागरिकमा सचेतना कार्यक्रम आवश्यक रहेको बताउनुभयाे । 

वन डढेलो व्यवस्थापनका लागि निरोधात्मक उपाय अवलम्बन गर्दै डढेलोबाट हुने जन, धन र वनको क्षति न्यूनीकरण गर्ने सचेतना सप्‍ताह कार्यक्रम सञ्चालन गरिएको कार्यालयले जनाएको छ।

नगरप्रमुख पन्थीले अघिल्लो वर्ष गुल्मी जिल्लाले भोग्नुपरेको क्षतिको स्मरण गर्दै वनमा लाग्ने आगलागी र डढेलोका घटना प्राकृतिक नभई मानवीय लापरबाहीका कारण हुने गरेको बताउनुभयाे । 

वनमा हुने आगलागी र डढेलो नियन्त्रणका लागि नगरपालिका सदैव गम्भीर र प्रतिबद्ध रहेको नगरप्रमुख पन्थीले बताउनुभयाे । गुल्मीमा दुई नगरपालिका र १० गाउँपालिका रहेका छन्। हाल जिल्लाभर रेसुंगा नगरपालिकामा मात्रै एउटा दमकल छ। 

शुक्रबारदेखि सञ्चालन भएको सप्‍ताह कार्यक्रम चैत ७ गतेसम्म चल्ने छ। जिल्ला सदरमुकाम तम्घास बजारमा डढेलो नियन्त्रण तथा सचेतनाका पर्चा र ब्यानरसहित बजार परिक्रमासमेत गरिएको थियो ।