सिस्नेरीमा अस्ताएका यी ६ बालक

तस्बिर : सामाजिक सञ्जाल

सिस्नेरी पहिरोमा परी मृत्यु भएकामध्ये एन्फा एकेडेमीका तीन बालकको शव साेमबार हेटौंडा लगिएकाे छ ।

मकवानपुर जिल्ला फुटबल संघले हेटौंडाको हुप्रचौरमा मकवानपुरका अनुपम घलान,साइमन योन्जन र बाराका विकल रेग्मीको श्रद्धाञ्जली कार्यक्रम आयोजना गरेको हाे । 

असोज १२ गते एन्फा एकेडेमीमा आवासीय प्रशिक्षण लिइरहेका ४० मध्ये ६ जनालाई पहिराेले पुरेको थियो । उहाँहरु मकवानपुरको इन्द्र सरोवर गाउँपालिकास्थित बात्सल्यदेवी माध्यमिक विद्यालयमा अध्ययनरत हुनुहुन्थ्याे ।

उहाँहरुले अखिल नेपाल फुटबल संघ (एन्फा) बाट पूर्ण आवासीय छात्रवृत्ति प्राप्त गर्नुभएकाे थियाे ।

मृत्यु हुनेमा हेटौँडा–१२ का घलान, इन्द्रसरोबर सिस्नेरीकै दिवस बानियाँ, मकवानपुरगढी गाउँपालिकाका योञ्जन, बाराका रेग्मी, सर्लाहीका आदित्य बलम्पाकी र काठमाडौंका रियान्स आचार्य हुनुहुन्थ्याे ।

एन्फाले गत वैशाखबाट देशभरका ४० जना विद्यार्थी छनोट गरेर पूर्ण छात्रवृत्तिमा फुटबल प्रशिक्षणसहित औपचारिक विद्यालय अध्ययनको व्यवस्थापन गरेको थियो ।

मृत्यु भएकामध्ये तीन जनालाई हेलिकप्टरमार्फत हेटौंडा लगिएको हाे । शवयात्रामा सयौं ब्यक्तिकाे सहभागिता थियाे ।