मुठी दानको भरमा गुरुकुल

कञ्चनपुरको भीमदत्त नगरपालिका–८ स्थित भम्केनीधाममा रहेको महाकाली शारदा विद्यापीठ वेद विद्याश्रम गुरुकुल आर्थिक अभावमा जेलिएको छ । 

वैदिक संस्कृत शिक्षा संरक्षणमा टेवा पु¥याउने उद्देश्यले सञ्चालित गुरुकुलमा २०७७ सालदेखि कक्षा ६ मा पठनपाठन भइरहेको गुरुकुलका अध्यक्ष मोहनचन्द्र जोशीले जानकारी दिनुभयो । ‘गुरुकुलीय शिक्षा पद्धतिमा आधारित भएर विद्यार्थीको नैतिक, चारित्रिक, धार्मिक, बौद्धिक विकास गर्नेलगायत कार्यक्रम सञ्चालन गरेका छौँ,’ उहाँले भन्नुभयो, ‘विद्यार्थीलाई स्वावलम्बी र आत्मअनुशासित बनाउने उद्देश्य छ तर आर्थिक अभावले सञ्चालनमा कठिनाइ आएको छ ।’

उहाँका अनुसार निःशुल्क आवासीय व्यवस्थासहित १५ जना विद्यार्थी गुरुकुलमा अध्ययन गरिरहेका छन् । ‘गुरुकुलमा पठनपाठन गर्न भौतिक संरचनाको अभाव छ,’ जोशीले भन्नुभयो, ‘अहिले दाताको सहयोग र मुठी दानको भर छ ।’

नगरपालिकाबाट वार्षिक पाँच लाख रुपैयाँ प्राप्त हुने भए पनि उक्त बजेटमा चारजना शिक्षक र अन्य खर्च व्यवस्थापन गर्न नसकिएको उहाँको भनाइ छ । ‘हाम्रो योजना ३०÷४० जना विद्यार्थी राख्ने हो तर भौतिक पूर्वाधारको अभाव छ,’ उहाँले थप्नुभयो, ‘प्रदेश सरकारले निर्माण गर्न लागेको आठकोठे भवन पनि अधुरै छ ।’

गुरुकुलमा पाठयक्रमअनुसार नेपाली, अङ्ग्रेजी, गणित, कर्मकाण्ड, संस्कृत व्याकरण, नीतिशास्त्र र संस्कृत संरचनालगायत विषय पठनपाठन भइरहेका छन् ।